USAFI WA KINYWA

Usafi wa kinywa na meno ni muhimu ili kudumisha afya bora ya meno, fizi, na kinywa kwa ujumla, pamoja na kuzuia matatizo kama kuoza kwa meno, ugonjwa wa fizi na harufu mbaya ya mdomo (halitosis).

Vitu muhimu vinavyotumika katika kusafisha kinywa na meno.

1.Dawa ya Meno yenye madini ya Fluoride
Dawa ya meno yenye fluoride ni bidhaa ya msingi ya kusafisha meno. Fluoride ni madini yanayosaidia kuimarisha meno na kuzuia kuoza kwa meno. Kuimarisha meno: Fluoride husaidia kuimarisha sehemu ya nje ya meno(enamel), kuzuia kuoza,kupunguza uwezekano wa madoa kwenye meno. kuondoa bakteria na mabaki ya chakula, hivyo kuzuia magonjwa ya fizi.

2.Mswaki wenye nyuzi laini 
Mswaki wa kawaida au mswaki wa umeme unaweza kutumika. Ni muhimu kuchagua mswaki wenye nyuzi laini ili kuepuka kuharibu fizi au enamel ya meno. 

3. Uzi wa Meno(dental floss)
Hii inatumika kusafisha nafasi kati ya meno ambako mswaki hauwezi kufika.Inashauriwa angalau mara moja kwa siku, hasa kabla ya kulala, ili kuondoa mabaki ya chakula kati ya meno.

4.Dawa ya Kusafisha Mdomo(Mouth wash)
Hii husaidia kufikia maeneo ambayo mswaki na floss haviwezi kufikia, kama vile sehemu ya nyuma ya ulimi na kwenye mashavu ya ndani.Tumia mara moja kwa siku, kwa sekunde 30 hadi dakika 1, baada ya kupiga mswaki na kufloss kuzuia harufu mbaya ya mdomo.
Zipo aina mbili yenye Chlorhexidine na fluoride,yenye fluoride husaidia kuimarisha meno, na ile yenye chlorhexidine inazuia maambukizi ya bakteria.

5. Kipakaza Ulimi(tongue scraper)

Hii hutumika kusafisha uchafu, bakteria na mabaki ya chakula yanayojikusanya kwenye ulimi.Tumia kila siku baada ya kupiga mswaki kuondoa harufu mbaya.

6. Marashi ya kinywa(Halitosis Spray)
Hutumika ili kuondoa harufu mbaya ya mdomo kwa haraka.Ni dawa ya kunyunyizia kwenye mdomo baada ya kula au wakati unapohitaji harufu safi haraka.Nyunyiza spray kwenye mdomo baada ya kula, kunywa, au wakati wa kujisikia kuwa na harufu mbaya ya mdomo.

7. Miswaki Midogo ya Kati ya Meno(Interdental Brushes)
Hii ni maalum kwa kusafisha mabaki ya chakula kati ya meno kwenye nafasi pana ambazo floss haiwezi kufika vizuri.Tumia baada ya kula ili kuondoa mabaki ya chakula kati ya meno.

 Njia Nzuri ya Kusafisha na kulinda Kinywa na Meno:

• Safisha meno mara mbili kwa siku yaan asubuhi baada ya chakula cha asubuhi na usiku kabla ya kulala ukitumia mswaki wa nyuzi laini na dawa ya meno yenye fluoride. Hakikisha unafanya kwa dakika mbili, ukizingatia sehemu zote za meno yaan mbele,nyuma sehemu ya kung’atia na kati ya jino na jino, fizi na ulimi.
• Anzia upande wa juu kulia kuelekea kushoto kwa taya ya juu na chini.
• Piga mswaki kwa kuzungusha mswaki ili kugusa maeneo yote ya jino.
• Floss mara moja kwa siku ili kuondoa mabaki ya chakula kwenye nafasi kati ya meno ambapo mswaki hauwezi kufikia.
• Tumia mouthwash yenye chlorhexidine au fluoride kwa sekunde 30 hadi dakika 1 baada ya kupiga mswaki na kufloss.
• Tumia kipakaza ulimi kusafisha uso wa ulimi mara moja kila siku ili kuzuia harufu mbaya ya mdomo.
• Tumia halitosis spray wakati unahisi kuwa na harufu mbaya ya mdomo baada ya kula au kunywa.
• Epuka vyakula na vinywaji vinavyoweza kusababisha madoa kama vile kahawa, soda, na sigara, na hakikisha unakunywa maji mengi kusaidia kusafisha kinywa.
• Hakikisha unahudhuria miadi ya meno kwa daktari wa meno kwa ukaguzi na usafishaji wa kitaalamu angalau mara mbili kwa mwaka.

Faida za Usafi Bora wa Kinywa:

• Kuzuia kuoza kwa meno: Usafi wa mara kwa mara huondoa mabaki ya chakula na bakteria, hivyo kuzuia kuoza kwa meno.
• Kuzuia magonjwa ya fizi: Kusafisha fizi na meno vizuri hupunguza hatari ya magonjwa yanayoshambulia fizi.
• Kuzuia harufu mbaya ya mdomo: Kuondoa bakteria na mabaki ya chakula huzuia harufu mbaya ya mdomo (halitosis).
• Kuboresha afya ya mwili kwa ujumla: Usafi wa kinywa unahusiana na afya bora ya mwili, kwani magonjwa ya kinywa yanaweza kuathiri afya ya moyo na viungo vingine.
• Kufanya haya yote kwa usahihi kutahakikisha unakuwa na afya bora ya kinywa na meno na kusaidia kuepuka matatizo makubwa ya afya ya kinywa.

Imeandiikwa na;

Dr. Samson Ngelela.

Mratibu elimu KSI